Khotbah I Musa 31: 36-44.

Jamita : I Musa 31: 36 – 44 "Manghangoluhon Haluaon"
Minggu : 11 Set. Trinitatis
Tgl. 15 Agustus 2010
Pdt. Resort Huta Tinggi (Pdt. Resort HKI Huta Tinggi)


I. Patujolo
Merdeka ! Merdeka ! Merdeka !
Merdeka ( Ing = freedom, marlapatan : kemerdekaan manang kebebasan). Kebebasan sian hapogoson; Kebebasan laho mangula siulaon; Kebebasan mandok sidohonon, dna. Kebebasan yang dimiliki seseorang sebagai hak asasinya. Na marlapatan do i, ianggo Kemerdekaan / Kebebasan i ima hak asasi ni sasahalak, jala silehon-lehon ni Jahowa do i tu angka jolma na tinompa-Na .
Jala sejarah pardalanan ni bangso Israel marmula sian sejarah pelepasan manang pembebasan na pinatupa ni Jahowa tu bangso-Na i sian tano Misir. Haruruar (Exodus/Keluaran) ni bangso Israel sian tano Misir dihatindangkon gabe haporseaon na parjolo tubu di sude marga-marga ni Israel, na mandok Jahowa do na patupahon Haluaon dohot tujuan asa parngoluon ni bangso-Na i dibagasan hadameon (Pembebasan yang menghadirkan syalom = damai sejahtera).
Suang songoni angka sude uhum dohot aturan na masa di pardalanan ni bangso Israel marurat sian Haluoan na pinatupa ni Jahowa na paruarhon nasida sian parhatobanon Misir, na gabe bangso (jolma) na daulat (= merdeka). Jala jumpang nasida do “kemerdekaan” ni setiap individu tarlumobi ma angka na tarbuang, na gabe hatoban hinorhon hapogosonna na gabe terpaksa manggadis partalianna nang ngoluna asa boi tetap bertahan hidup, ima di taon palimapuluhon (dung salpu pitu taon Sabbat), ima Taon Parolopolopon (Tahun Yobel) (jaha 3 Musa 25).
II. Isi
Turpukta on, na marisihon pangkataion ni si Jakkob dohot si Laban, na marboncir sian pangaleleon ni si Laban tu si Jakkob ala lintun marsibuni ianggo si Jakkob sian tulangna i. Angkup ni naung tarbortik tu si Jakkob angka hata ni tungganena (angka anak ni si Laban) na mandok: “Nunga diahuti si Jakkob sinamot ni amanta i do hamoraonna on sudena”. Jala bohi ni si Laban pe, ndang songon na sai laon dompak ibana. Dohot hata ni Jahowa na mandok tu ibana: “Mulak ma ho tu tano ni angka ompum, tu tano hagodanganmu, hudongani pe ho”. (bindu 31: 1 – 3). Boi dohonon na mangonjar roha ni si Jakkob gabe lintun marsibuni manadingkon tulangna si Laban, ima ala asa malua (bebas) manang gabe jolma na merdeka; ndang olo be ibana di jolo ni tulangna i naung 20 taon lelengna diulahon ibana songon parkarejo (naposo) na manjalo upa sian ulaonna i.
Songon di hadirion ni halak Batak taringot tu bona pasogitna na tongtong manghaholongi bangsona, mangargahon habatakkonna, na tongtong masihol laho mulak tu huta hatubuanna, ido umbahen na sai disosohon asa diargahon halak Batak bona ni pasogitna manang di dia pe ibana, manang naung gabe aha pe ulaonna, na ingkon argahononna do tano hatubuan dohot hagodanganna manang bona ni pinasana i. Songon hata na mandok, “Arga do bona ni pinasa, dipingkir angka na marroha. Nang pe laho marhutasada, sai ingot, ingotma tu huta. Dao pe ho marhutasada, di purba manang di dangsina. Tongtong ingot tona ni ompunta, sai mulak, mulak ma tu huta”. Dohot di hata na mandok, “Walau hujan emas di negeri orang, masih lebih baik hujan batu asal di negeri sendiri”.
Doshon songoni ma nang si Jakkob na marhuta sada tu huta ni halak habinsaran, tu luat Padang – Aram inganan ni tulangna si Laban songon na tinonahon ni Isak, amana i. Si Laban ima halak Aram na tarbarita di luatna siala godang arta manang sinamotna jala ngoluna pe marhasonangan do. Disi ma si Jakkob mangula marmahani angka biru-biru dohot pahan-pahanan na asing pola lam tu deakna. Jala songon singkat ni upana sian ulaonna saleleng 20 taon i, ima :
Parjolo, dipangido si Jakkob ma tu si Laban asa dilehon boruna siampudan na margoar si Rahel gabe jolmana dohot padan na dipangulahon ibana marmahan saleleng 7 taon laho mambuat si Rahel. Dioloi si Laban do pangidoan dohot padan naniuarihon berena i. Dung jumpang padan nasida i, dipangido si Jakkob ma si Rahel asa gabe jolmana. Hape, ndang songon padan nasida i na ingkon si Rahel do na dipangido si Jakkob hian asa gabe ripena, alai boru sihahaan ni tulangna i do na margoar si Lea na gabe ripena. (hombar adat na masa di luat Haran manang di halak Aram, ingkon jumolo pamulihon sihahaan asa sianggian). Atik pe jut roha ni si Jakkob di pambahenan ni tulangna i, tarjalo ibana do na masa i siala tongtong marpadan tulangna i na ingkon lehononna si Rahel gabe jolmana dung jumpang 7 borngin dijabuhon rap dohot si Lea dohot pangidoan asa dipangulahon si Jakkob ma muse 7 taon lelengna gabe parkarejo ni si Laban. Singkat ni upa ni si Jakkob saleleng 14 taon ima dua boru ni tulangna si Laban na gabe jolmana.
Paduahon, dung ditubuhon si Rahel ma si Josep, dipangido si Jakkob do tu si Laban asa dipaborhat ibana laho manopot tano hatubuan dohot hagodanganna ima tu Tano Kanaan. Dipangido si Jakkob ma asa diloas si Laban ibana mamboan angka jolmana ( Lea, Rahel, Zilpa, Bilha) dohot angka tubuna sudena nang angka naung disamothon ibana marhite pangulahononna marmahani angka pahan-pahanan ni tulangna i. Di pangidoanna napaduahon on, tongtong marpadan nasida taringot tu parbagian ni angka pahan-pahan i, jala diulahon si Jakkob ma siulahononna muse saleleng 6 taon. Jadi mamora bulung ma si Jakkob ala ni angkalna laho mambalos angkal ni tulangna i, pola torop angka biru-biruna dohot naposona boru-boru dohot baoa, angka unto dohot halode (jaha bindu 30: 25 – 43).
Tolu hali ma nasida marpadan di angka na sinangkapan ni roha nasida nadua. Alai duansa do nasida rap hea mangose padan na pinadanhon nasida. Tutu, molo adong na mangose padan ingkon tubu ma parsalisian, parbadaan, hagunturon di angka na marpadan i. Hape ia parpadanan i tujuanna asa parohon hadameon/hadengganon di angka na marpadan. Molo marpadan angka na parangkal songon si Jakkob dohot si Laban on, ndang boi jumpang hadameon/ hadengganon di ujungna. Na ingkon dihangoluhon manang diulahon dohot sasintongna do hape isi ni parpadan i asa jumpang hadameaon/hadengganon (syalom).
III. Sipahusorhusoron
Tapuji ma Tuhan Jahowa Pardenggan Basa na sumurung i naung mangalehon Kemerdekaan (Haluaon) tu bangsonta Republik Indonesia jala na sai tongtong mangaramoti hita angka pangisi ni negara Republik Indonesia sahat ro di tingki on. Jala di tanggal 17 Agustus 2010 na naeng ro on, tepatma taolophon ari parningotan Kemerdekaan Republik Indonesia naung marumur 65 taon.
Jala gok puji-pujian dohot hasangapon mardongan mauliate ma di Tuhanta Jesus Kristus naung paluahon hita sian gomgoman ni dosa nang hamatean na manongtong i. Songon Hata-Na na mandok, “Songgop do tu Ahu Tondi ni Tuhan i, ai dimiahi do Ahu, mamboan barita na uli tu angka na pogos. Disuru do Ahu, mamaritahon tu angka na tarhurung asa malua, tu angka na mapitung asa marnida, paluahon angka na ginosagosa, mamaritahon taon parasinirohaon ni Tuhan i.” (Lukas 4: 18-19). Hita jolma pardosa nunga manjalo “Taon Parolopolopon (Tahun Yobel)” ima Haluoan (Kemerdekaan) na pinatupa ni Jahowa marhite-hite Tuhan Jesus Kristus sahali ro di salelengna (ex havax). Ibana do na mamintori hita gabe sahat hatigoran hangoluan tu saluhut jolma; gabe mardame (dipadame) hita dohot Tuhan Jahowa hinorhon ni panobusion na dibagasan mudar-Na na badia i.
Angka naung dipalua (orang yang merdeka) do hita nuaeng marhite-hite haporseaonta tu Tuhan Jesus, Sipalua i. Tajalo do Padan Hadameon sian Ibana ima, “…, asa unang mago ganup na porsea di Ibana, asa hangoluan na saleleng-lelengna di ibana.” (Joh 3:16). Hot ma antong Padan Hadameon/Haluaon i mian di hita jala unang be olo hita diela-ela jala dipatunduhon ni auga parhatobanon sibolis i. Tahangoluhon ma Padan Hadameon/Haluaon (Kemerdekaan orang Kristen) ima na mangeahi hatigoran, hadaulaton, haporseaon, holong ni roha, habengeton dohot lambok ni roha. Jala tasodahon ma roha na so daulat ro di angka hisap-hisap ni tano on.
Ai hadameon do jumpang sian padan naung diparade Jahowa marhite-hite Tuhan Jesus Kristus na manghorhon Haluoan di hita. Ipe, taringkoti ma asa mardame tu saluhut halak. Siala dibagasan dame do disaburhon parbue hatigoran di angka na olo mangulahon dame naung nilehon Tuhanta tu hita. Amen…