“ Rap Ruas ( Daging ) ni Kristus do Angka na porsea ! ”
( Tapangke ma silehon-lehon ni Tuhanta i tau hasagapon di Goar-Na )
I. Patujolo
Saluhut angka na porsea ( = Kristen ) manjalo basa-basa / silehon-lehon na sian Jahowa marhite-hite Tuhan Jesus na dipataridahon marhite-hite panumpaki ni Tondi Porbadia. Ganup halak porsea targoar “kharismatik”; ima angka naung manjalo “karismata” ( Yun = karis, anugerah, karunia) sian asi dohot holong ni roha ni Tuhan Jesus Kristus.
Jala “karismata” na jinalo ni sasahalak marasing do i sian na jinalo ni donganna. Adong do “karismata” : habisuhon, parbinotoan, pamalumhon, patupahon halongangan, manurirangi, mananda ragam ni tondi, marhata na leban ( bahasa lidah), pajojorhon parhataan, manghobasi, marende, dna angka na ringkot paturehon dohot paulihon huria ni Tuhan i.
Di na laho patorangkon ragam ni “karismata” (baca: silehon-lehon, karunia) na adong di tonga-tonga ruas ni huria na di luat Korintus, umbahen dipatorang apostel Paulus marhite tudosan mangumpamahon tu pamatang (daging) ni jolma. Ragam do ruas ni pamatang i, alai sada do pamatang i. Suang songoni ma ragam do “karismata”, alai sada do na mangkorhonsa ima Tuhanta Sitolusada I (Trinitatis) dohot sada tujuan ima laho paturehon dohot paulihon huria ni Tuhan i ( I Kor. 14: 5).
II. Hatorangan
Ragam ni “karismata” i dipatudos songon ragam ni ruas ni pamatangta. Ndang na holan sada ruas ni pamatangta i alai tung torop do. Jala sian hatoropon ni ruas ni pamatangta i do umbahen gabe sempurna (utuh). Adong ruas simanjujung, simalolong, parbinegean, parnianggoan, simanjalo, simanjojak, nang obuk sahat ro di sisilon i pe ruas ni pamatangta na saling melengkapi satu sama lain.
Ai dipatomu Tuhan i do pamatangta i asa unang marsalisi angka ruasna, alai asa denggan masipasarisarian ruas na sumangap dohot ruas na lea laho pahothon sada hasadaon ni pamatang i. Suang songoni ma angka na porsea (= ruas ni Huria) unang ma adong tubu “kesombongan rohani” na mandok dirina sumangap sian angka donganna. Ai dipangke Tuhan i do saluhutna ruas ni Huria-Na i baik na sumangap “karismata”na, dohot na lea “karismata” na di ibana. Contoh: molo tung malo sasahalak marjamita, ndang sada jaminan na malo ibana di bidang administrative manang penatalayanan. Molo tung malo pe sasahalak martangiang, belum tentu malo ibana dohot markoor.
Sandok, angka na porsea (= partohonan nang ruas ni Huria) naung manjalo “karismata”, dipangke ma i gabe parhitean hasahatan pasu-pasu tu angka donganna jolma tarlumobi ma tu Huria ni Tuhan i. Jala dibagasan serep ni roha ma dipataridahon “karismata” naung jinalona i; sian nasa rohana dohot sian nasa gogona asa tau hasangapon ma i di Goar ni Tuhan Jesus, Ulu ni Huria i.
III. Panimpuli
Marasing be do “kado” (karismata =silehon-lehon, karunia) na tajalo sian Tuhan i. Alai tung pe marasing jala marragam be “kado” i, na sada ianggo tujuanna ima asa tapange / taparidahon laho paturehon dohot paulihon pardalanan pelayanan ni Hurianta be, jala sasudena i ingkon ma marruhut na denggan huhut maratur hombar tu lomo ni roha ni nampuna Huria i, ima Tuhan Jesus Kristus. Amen …
******************
